動物警察
語音檔案: 
（左起：阿國、快必）
歡迎聽眾留言分享…
任意網為：虐貓英泥浴
2010年4月13日（太陽報）
小白觀點:特警成應掌動物警務處
又有賤人虐貓！繼上次彩園邨有小花貓畀人斬腳後，今次到香港仔有五隻貓仔畀人掟落缸浸英泥漿浴，搞到全身皮毛被乾涸英泥黐實，獸醫見到都冇晒符，簡直冇人性！
小弟喺動物電視頻道睇過一套《Animal Cops》，原來外國有動物警察呢家嘢，大家唔好當佢哋流呀，警員全部都受過正規訓練，出更時要荷槍實彈，同一般警察冇乜分別，仲要周不時破門入屋捉虐畜疑犯，好夠阻嚇力。
近年社會充滿戾氣，虐畜問題亦愈嚟愈嚴重，再係咁落去唔係辦法，本欄建議當局成立一個「動物警務處」，反正一哥特警成就嚟冇得撈，以佢嘅縱容濫權資歷，好適合做「動物警務處處長」一職。嗱，捉到虐貓虐狗狂徒呢，唔使客氣o架，剝光豬通櫃又好，隔住電話簿毒打亦好，甚至用埋文革酷刑都得，本欄一定支持！
阿豪觀點:冷血賤人亂用無限創意
人類嘅創意係無限，可惜好多時發揮咗喺錯誤嘅方面。好似天拿水咁，原本係用嚟清潔，又可以開油，好使好用，點知有啲人竟然用嚟索。同樣道理，英泥係一種好常用嘅建築材料，點知有個別賤人，當佢係虐待貓咪嘅工具，竟然將幾隻小花貓掟落英泥缸裏頭，簡直令人髮指呀！
最慘係，面對呢種咁有「創意」嘅虐貓方法，連獸醫都束手無策，根本唔知有咩方法可搣番甩啲水泥。咁又係嘅，情況正如「板男根」同埋「翠玉瓜男」咁樣，情況實在太騎呢，獸醫又唔係做裝修，鬼識咩！
不過唔緊要，本報請教過建造業總工會嘅代表，原來只要用暖水幫貓兒清洗，抹乾身後，夜晚喺佢哋全身搽一層薄薄嘅生油當滋潤膜，第二日再用暖水清洗就ok。至於work唔work，就要將嗰幾個虐貓嘅冷血之徒掟落去英泥度試一試喇！
高空冷血殺手 掟死五隻貓
2010年04月20日 (蘋果日報)
【本報訊】平日吸引不少中外遊客的深水埗鴨寮街，慘成狂徒擲物勝地。繼連番擲鏹水及擲菜刀事件後，前日竟有「貓殺手」將一大四小花貓從高處掟落街。「一家五口」慘死伏屍大廈天井地上，其中大貓更是懷有身孕，場面駭人。關注流浪貓組織懷疑是一名戴口罩的「四眼仔」所為，譴責兇徒暴行之餘，更敦促當局安裝閉路電視及成立動物警察隊加以打擊。記者：文兆麟、鄧偉明
發生虐殺五貓現場是鴨寮街 188號一幢八層高的唐樓，上周四（ 15日）斜對面的鴨寮街 205號有人將一柄菜刀擲下；上月 7日及去年 10月 24日，附近鴨寮街 212號及 185號先後發生擲鏹水事件，連番事故令街坊人心惶惶。至於今次擲貓事件的「貓殺手」，疑是一名 5呎 4吋高，戴粗框眼鏡和口罩的男子。
四眼疑兇曾用丫叉篤貓
在鴨寮街及桂林街一帶餵飼流浪貓已有一段時間的貓義工楊小姐稱：「以前（區內）流浪貓維持大約 20隻，但最近明顯減少咗，得番幾隻，成條街冇晒貓」，她懷疑「失蹤」的流浪貓都被虐殺了。
楊小姐說，懷疑「貓殺手」是個四眼仔，過去不時站在她餵貓地方遠處張望，鬼鬼祟祟的，十分可疑。她曾經見過該名男子用丫叉「篤」流浪貓玩樂，也曾見四眼仔餵飼牠們，但被餵飼過的貓，沒幾天就會人間蒸發，非常恐怖。她又表示，有流浪貓走到醫局街一些流浪漢聚居的地方後，便一去不返。
今次一家五口花貓慘死事件發生在前日早上 10時左右。鴨寮街 188號有住客聽到有貓的哀鳴聲，以為有貓意外墮下天井被困，於是致電業主立案法團主席。當時各人仍不知原來共有五隻貓墮下，相信當時牠們仍然未死。主席事後通知姓李秘書到場，李查看下赫見五貓倒卧天井，已氣絕身亡，懷疑被人從高處擲下，場面十分駭人：「好陰功，嗰隻大貓仲大咗肚……真係食十世齋都補唔番！」
「點會五隻貓一齊失足」
慘死花貓包括一隻成年雌性黑貓和相信是牠所生的四隻約兩個月大小貓。五條貓屍僵硬攤在昏暗天井內，警方及愛護動物協會人員事後接報到場了解，但並無發現。至昨晨 11時許，由李秘書在場撒消毒藥粉，再將貓屍放入膠袋棄置。他表示，連同今次，大廈過去五年已發生過至少三次高空墮貓事件。
愛護動物協會發言人則稱，協會初步發現慘死的五隻花貓四肢及身體沒有傷痕，相信是由高處墮下，但未知是失足墮下還是被人掟落街。李秘書謂：「一隻貓仔就話有可能啫，點會五隻貓一齊失足呀？」他懷疑有狂徒掟貓落街。李續稱，他發現貓屍後曾經致電食環署，但署方以現場為私人地方為理由拒絕代為清理，他無奈只好自行執屍，對此十分不滿。食環署解釋，肇事的貓屍並非可傳播禽流感的雀鳥，一般會交由大廈管理處或法團自行派承辦商清理。
據住客陳先生表示，他認出慘死的黑貓以往和另一隻黃貓結伴，「佢哋係流浪貓，成日喺二樓簷篷走嚟走去，有個阿婆日日攞嘢餵佢哋。不過阿婆今年初死咗，啲貓就好少出現嘞。」陳先生續稱：「隻黃貓後來唔見咗，隻黑貓就成日嗌，由朝嘈到晚，話唔定有人捉咗掟落街！」
關注流浪貓組織香港群貓會幹事陳靈怡表示，深水埗虐貓情況嚴重，該會曾組織志願小組巡查，但效用不大，建議當局在大廈安裝閉路電視及成立動物警察，打擊虐貓暴行。
近期虐及殺害流浪貓事件簿＊
2010年 3月 1日
上水彩園邨彩屏樓對開公園，一隻小花貓左前腳遭齊口切斷
2009 年 10月 19日
深井海韻花園後山，兩大兩小花貓疑遭亂棍打死
2009年 9月 9日
深井陳記廣場對開路邊，兩大一小花貓疑遭毒殺死亡
2009年 5月 31日
屯門麒麟圍垃圾站一大兩小流浪貓被腐蝕液體淋潑死亡
2009年 3月 4日
銅鑼灣街頭一頭黑貓疑遭虐待至右前腳骨折、肚皮有被火燒傷痕
＊不包括昨日一宗
資料來源：《蘋果》資料室
